আইপিনিউজ ডেস্ক (রাঙ্গামাটি): কবি ম্যাকলিন চাকমা নতুন তিনটি কবিতা রচনা করেছেন। চাকমা ভাষায় রচিত এ তিনটি কবিতার নাম “খারাঘর”, “আহভিলেচ” এবং “সাঝন্যের জুম পহধ ধোরি”।
১. খারাঘর
আগর তরুনো পহধ, দবদভা কলগ, দাঙা জুমভুই, মর ভালোক বঝরর কুদুম্বো আহওচ
ইরুক বেল উদোন্দিত কজমা গরি ন ফিরে আর।
আলগ আলগ ফাগুনোত
ভাত ঝরা ফুলুন নিবুলি তারুমত ন ফুধোন,
তদেগ পেগর ঝাগ কিদিরিঙ ন গালন, শষ্য ফুলুন হরি ন অন দাঙদাঙগে অয় আঘে কোচপেয়ে চাদিগাঙর দীঘোল পহধ।
নি-চিদে চিদে কায় ফিরিবের নধে
পিরল্যে গাঝত এহল এহল কুঝি কুঝি পাধানি কোর ন উধে
ঠেঙ হূচ ফেলাধে মাত্তল্যে বৈয়ের কেয়েত ন ফুধে
পাদা ঝরিবের অক্তত কিতত্যেই জানি
ভালোক বজরর জমে তোয়ে অঝার সমনানি থেবরক কায়
সুঘ ন ফিরে খারাঘর পিত্তিমিত।
২. আহভিলেচ
কধক আহভিলেচ, চিকচিক্যে ছাবা পহধ বেই
কধক কধা কুঅ ন অয়
কধক চাম্বা ফুলর ভাঙগে মন
বারিঝের নিত্তাগে ছিগোন ছরানাল ভারি গাভুর হন।
বারিঝের গাভুরী অহলে কিঙিরি এধক হরান
হরান লুগেই জুম পহধ আহধি যাদে ছিদিচ ত রঙান
কায় তুই এইচ জনমান থেবার আওহঝ গরি
সংভাগী হেনত নিলোঝ গালিম তর রিবেঙত পরি।
নিঝিরেইত, কিত্থে এধক দিন পর তুই এহলে?
কধক সুঘর ভিদিরে দিন এইনেই রেইত গেল।
জুনিপুগ, চেরকিত্যে ফুদি উদে ভরন্দি সুরকাবোচ
কধা দিয়্যচ এককুড়ি থেবঙ সমারে
সুদোমর পহধ ধোরি লুগিলে জনমে
দুরত তুঅ কায় তুই-মুই রয়্যয়েই লুলঙ ঝরানর আন্দলে।
৩. সাঝন্যের জুম পহধ ধোরি
বিদি যেইয়্যো সাঝন্যের জুম পহধ ধোরি
মুই আহধঙর ভূষণছড়া আদামর থহল মুরো পহধর গঙারে।
জিংকানির অঝার তিরোজী সবন,
আঝা নিরাঝার তুবোলত
এই দিঘোল রেদোর পহধ আহধি যাদে দূরত্তুন কায় গোরি ধুধুগর র’ শুনো যায়
হুবাঙ, অগলক্খুন ধোগোরি যান এগামনে।
সাদেয়্যা বরাগুলো গাঝর ছেরে ছেরে দেগা যায় লুলঙ জুনান
পোল্যা পোল্যা রিনি চায় এগামনে
গোঝেই দোঙ আওজে এ দোল নিঝিরেইত
সংভাগী এ হেনর লাড়েয়ত জনম লোয়্যা
খবং মুগুজ্জে মুরউনোর লগরে।
গভীন আন্ধারর সমারে সোরিত অই কালা মেঘ
উবোলপাল মাত্তল বৈয়েরর সংভাগী অয়
জিংকানির রংবেরঙর পচ্ছন,
মনে হয় এই জুম তুগুনোর মানেয়র থিদোবী,লাড়েয়র চিন মাজারা
কধক কায়,কধক সদর গোরি যুগ যুগ ধরি আমা সাঙেত-লগর ওই আগে।
কবি পরিচিতি: ম্যাকলিন চাকমা পার্বত্য চট্টগ্রামের প্রগতিশীল তরুণ কবি ও সাহিত্যিক। জন্ম ১৯৯৩ সালের ১০ই অক্টোবর, রাঙ্গামাটি, পার্বত্য চট্টগ্রাম, বাংলাদেশ। প্রকাশিত কাব্যগ্রন্থ তিনটি। তিনি দুটি সাহিত্য ম্যাগাজিন সম্পাদনা করেছেন। চাকমা ভাষায় ছোটগল্প, গান ও নাটক লিখছেন। বর্তমানে মোনঘরে সহকারী প্রকাশনা কর্মকর্তা হিসেবে কর্মরত আছেন। পাশাপাশি চিটাগং হিল ট্রাক্টস রাইটার্স ইউনিয়নের কার্যনির্বাহী কমিটির সহ গবেষণা সম্পাদক পদে দায়িত্ব পালন করছেন।
